Albania News Agency

Presidenti i Sirisë, Ahmed al-Shara, dërgoi trupa në jug të vendit për të ndalur përleshjet e përgjakshme mes druzëve dhe fiseve beduine që nisën të dielën dhe lanë rreth 600 të vdekur.

Menjëherë pas deklaratës së Sharas, Izraeli bëri të ditur se kishte lejuar forcat qeveritare siriane të hyjnë në rajonin e Suvejdas për dy ditë për të mbrojtur civilët, duke e quajtur këtë hap të nevojshëm për shkak të “pasigurisë së vazhdueshme”.

Izraeli vazhdoi të kërkojë çarmatosjen e plotë të jugut të Sirisë dhe këtë javë kreu sulme ajrore në Suvejdë dhe Damask për të mbrojtur pakicën druzi nga sulmet e regjimit. Izraeli dhe Siria ranë dakord dje për një armëpushim.

Dhuna ndaj druzëve dhe pakicave të tjera siriane është rritur që kur Shara dhe lëvizja islamiste HTSh rrëzuan Bashar al-Asadin vitin e kaluar.

Kreu i të Drejtave të Njeriut në OKB, Volker Türk, raportoi se shumë druzë janë ekzekutuar pa gjyq këtë javë në Suvejdë dhe se edhe forcat e sigurisë së regjimit morën pjesë në ekzekutime.

Ahmed al-Shara fajësoi “grupet në mërgim” për valën e dhunës dhe premtoi se do të kërkojë përgjegjësi nga autorët. Në një fjalim të enjten, ai tha se mbrojtja e druzëve në Siri do të jetë prioriteti i tij.