Albania News Agency

Tesla njoftoi në mbledhjen e saj vjetore të aksionarëve se mbi 75% e aksioneve votuan në favor të paketës. Pjesëmarrja nuk përfshinte 15% të aksioneve që tashmë i përkasin Muskut.

Kur u shpallën rezultatet, turma shpërtheu në brohoritje. Musk falënderoi aksionarët dhe bordin e Tesla-s duke thënë: “Jam shumë mirënjohës.”

Musk nuk merr rrogë, por paketa e miratuar përfshin një grant aksionesh që do t’i japë atij 423,7 milionë aksione shtesë të Tesla-s gjatë dhjetë viteve të ardhshme.

Nëse kompania arrin një kapitalizim tregu prej 8,5 trilion dollarësh, i nevojshëm për pagesën e plotë, këto aksione mund të vlejnë rreth 1 trilion dollarë. Për të marrë të gjitha 12 blloqet e aksioneve, Tesla duhet të përmbushë objektiva të caktuara operacionale dhe financiare.

Marrja e të gjitha aksioneve për 10 vjet është e barabartë me fitimin e 275 milionë dollarëve në ditë – më e madhja në historinë e pagave ekzekutive.

Për të arritur vlerën e kërkuar të tregut prej 8,5 trilion dollarësh, aksionet e Tesla-s duhet të rriten me 466%, rreth 70% më shumë se kapitalizimi i Nvidia-s që arriti rekordin prej 5 trilion dollarësh javën e kaluar.

Nëse paketa do të ishte refuzuar të enjten, Musk mund të kishte dhënë dorëheqjen si CEO i Tesla-s. Bordi i kompanisë tha se Musk kishte përmendur mundësinë e largimit nëse nuk do të kishte siguri mbi kontrollin.

Kompania ka kaluar një vit të vështirë – shitjet dhe fitimet ranë, ndërsa Tesla përballet me humbje të mëdha për shkak të zvogëlimit të mbështetjes qeveritare për automjetet elektrike.

Në fjalën e tij para aksionarëve, Musk foli më shumë për robotët që ende nuk janë në shitje, duke thënë se ata do të bëhen më fitimprurës se biznesi i makinave.

Ai theksoi se i duhen më shumë aksione për kontroll më të madh të kompanisë, jo për pasuri shtesë personale.

Muajin e kaluar, në një bisedë me investitorët, Musk tha: “Nuk do t’i shpenzoj këto para. Dua të kem mjaftueshëm vota për ndikim, por jo aq shumë sa të mos mund të më largojnë nëse çmendem.”