Albania News Agency

Drejtori i Përgjithshëm i OBSH-së, Ghebreyesus, njoftoi se Spitali Kamal Adwan në veri të Gazës u sulmua mbrëmë nga një dron, duke shkaktuar dëmtimin e gjeneratorit elektrik nga i cili varet funksionimi i spitalit.

Ghebreyesus theksoi se si pasojë e sulmit, sistemi i oksigjenit doli jashtë funksionit: "Për shkak të konfliktit të vazhdueshëm dhe kufizimit të madh të qasjes, spitali nuk mund ta riparojë atë. Edhe rezervuari i ujit është dëmtuar dhe aktualisht spitali nuk ka ujë. Gjatë sulmit u plagosën 4 punonjës të spitalit dhe 2 shoqërues pacientësh. OBSH është thellësisht e shqetësuar për sigurinë dhe mirëqenien e 80 pacientëve, duke përfshirë 8 në njësinë e kujdesit intensiv, si dhe për stafin e spitalit."

Ghebreyesus theksoi se Spitali Kamal Adwan është një nga dy spitalet që funksionojnë pjesërisht në veri të Gazës: "Ne kërkojmë ndërprerjen e menjëhershme të luftimeve rreth spitalit dhe sigurimin e aksesit të vazhdueshëm për misionet humanitare për të ofruar ndihmë jetësore."