Albania News Agency

Qeveria amerikane dje anuloi vizën e gjyqtarit të Gjykatës së Lartë të Brazilit, Alexandre de Moraes, për sjelljen e tij në gjykimin e ish-presidentit Jair Bolsonaro.

Sekretari amerikan i Shtetit, Marco Rubio, tha lidhur me vendimin: “Gjuetia politike e shtrigave e zhvilluar nga gjyqtari Alexandre de Moraes kundër Jair Bolsonaro jo vetëm që shkel të drejtat themelore të brazilianëve, por ka krijuar një industri shtypjeje dhe censure që prek edhe amerikanët.”

Qeveria amerikane dje anuloi vizën e de Moraes për sjelljen e tij gjatë procesit gjyqësor ndaj Bolsonaro-s.

De Moraes është gjyqtari që po merret me çështjen ndaj Bolsonaro-s, i akuzuar për përpjekje për grusht shteti pas humbjes në zgjedhjet presidenciale të vitit 2023. Ai kishte urdhëruar vendosjen e një byzylyku mbikëqyrës në kyçin e këmbës së Bolsonaro-s gjatë seancave.

Bolsonaro është aleat dhe mbështetës i presidentit amerikan Donald Trump, i cili ka kërcënuar disa herë qeverinë braziliane për proceset kundër tij. Në fillim të këtij muaji, Trump njoftoi vendosjen e një tarife doganore prej 50% mbi eksportet nga Brazili në përgjigje të “gjuetisë së shtrigave”.

Presidenti aktual i Brazilit, Luiz Inácio Lula da Silva, deklaroi se është i gatshëm për bisedime për tarifat doganore, por ndalimi i çështjeve gjyqësore ndaj Bolsonaro-s për të kënaqur Trump-in nuk është një opsion.

Rubio, duke shpallur sanksione ndaj de Moraes, tha se edhe gjyqtarët e tjerë që janë në të njëjtin krah me të, si dhe familjarët e tyre, do të ndalohen të hyjnë në SHBA.