Albania News Agency

Burri, në të pesëdhjetat, ndodhej në sallonin e biznesit të Qantas të enjten në mëngjes. Powerbank-u i mbinxehur mori flakë, mbushi ambientin me tym dhe rreth 150 persona u evakuuan.

Stafi e futi menjëherë burrin në dush deri sa mbërritën punonjësit e emergjencës për t’i trajtuar plagët. Ai u dërgua në spital në gjendje të qëndrueshme dhe më pas u la i lirë.

Sipas gazetës *The Age*, një dëshmitar tha se “acid baterie ishte shpërndarë kudo”. Një zëdhënës i Qantas konfirmoi se salla u pastrua dhe u rihap pas dy orësh.

Regjisorja australiane Leanne Tonkes ndodhej në sallë atë mëngjes dhe dëgjoi kaosin. Ajo postoi një foto të powerbank-ut të djegur menjëherë pas shpërthimit.

“Shpresoj që burri që u përfshi nga flakët të jetë mirë. Stafi dhe personat që i dolën në ndihmë vepruan shumë shpejt për ta futur në dush dhe për të nxjerrë të gjithë jashtë,” shkroi ajo.

Qantas aktualisht po rishikon politikën e saj për pasagjerët që mbajnë bateri litiumi, përfshirë powerbank-ët portativë, dhe pritet të publikojë një përditësim së shpejti.