Albania News Agency

Turmat e zemëruara kërkuan të hynin në kompleksin ku këtë vit në qytetin brazilian Belém po mbahet konferenca e OKB-së me pjesëmarrjen e mijëra delegatëve nga e gjithë bota.

Disa valëvitën flamuj me slogane që kërkonin të drejta mbi tokën ose mbanin pankarta me mbishkrimin “Tokat tona nuk janë për shitje”.

Videot në rrjetet sociale tregojnë protestues, disa prej të cilëve duken si pjesëtarë të grupeve indigjene, që valëvitnin flamuj me logon e lëvizjes së majtë të të rinjve brazilianë Juntos.

Protestuesit, disa të veshur me rroba tradicionale indigjene, shihen duke bërtitur slogane, duke goditur dyert në hyrje të COP30 dhe duke u përleshur me rojet e sigurisë.

OKB-ja tha për BBC se protestuesit kishin kaluar pengesat e para të sigurisë, por u ndaluan për të mos hyrë më tej.

Bisedimet e COP30 po zhvillohen zyrtarisht nga e hëna, 10 nëntor, deri të premten, 21 nëntor, me delegatë nga rreth 200 vende.

Këtë vit, samiti shënon 10-vjetorin e Marrëveshjes së Parisit për Klimën, në të cilën vendet premtuan të kufizojnë ngrohjen globale në 1,5 gradë Celsius.

Konferenca po mbahet për herë të parë në Brazil, në qytetin Belém, në buzë të pyjeve të shiut të Amazonës.

Zgjedhja e vendit ka qenë e diskutueshme, veçanërisht mes banorëve të Amazonës që denoncojnë dëmet mjedisore të shkaktuara nga ndryshimet klimatike dhe shpyllëzimi.

Brazil gjithashtu vazhdon të japë licenca të reja për naftë dhe gaz – lëndë djegëse fosile që, bashkë me qymyrin, janë shkaku kryesor i ngrohjes globale.