Albania News Agency

Marrëveshjet me Argjentinën, Guatemalën, El Salvadorin dhe Ekuadorin vijnë në një periudhë kur politika ekonomike e presidentit amerikan Donald Trump dhe çështja e përballueshmërisë së produkteve po shqyrtohen me kujdes të shtuar.

Sipas kornizës fillestare, për mallrat që vijnë nga Guatemala, Argjentina dhe El Salvadori do të zbatohet një tarifë reciproke prej 10 për qind, ndërsa për importet nga Ekuadori drejt SHBA-së një taksë prej 15 për qind. Megjithatë, marrëveshjet do të përjashtojnë nga këto tarifa produkte si kafeja, të cilat nuk prodhohen në “sasi të mjaftueshme” në Shtetet e Bashkuara.

Këtë javë Trump dhe sekretari i Thesarit, Scott Bessent, u zotuan të ulin çmimet e kafesë, të cilat këtë vit janë rritur me rreth 20 për qind në SHBA. Bessent sinjalizoi gjithashtu lehtësim në tarifat për bananet dhe fruta të tjera.

Zyrtarë të lartë të administratës, të enjten, përmendën si shembuj të importeve nga katër vendet e Amerikës Latine që pritet të përjashtohen nga doganat, kafenë, kakaon dhe bananet.

Guatemala dhe Ekuadori renditen ndër vendet që eksportojnë më shumë banane drejt Shteteve të Bashkuara.

Edhe pse SHBA importon kafe nga vendet e Amerikës Qendrore, përfshirë Guatemalën, sipas të dhënave të Departamentit amerikan të Bujqësisë, eksportuesi më i madh i kafesë drejt SHBA-së është Brazili, i cili nuk është i përfshirë në marrëveshje.