Albania News Agency

Sipas The Guardian, Zelensky do të vizitojë Downing Street të hënën për të treguar mbështetje për Ukrainën dhe për të zhvilluar takime ballë për ballë me Starmer, Macron dhe Merz.

Starmer, në takimin me liderët e Ukrainës, Francës dhe Gjermanisë, do të diskutojë negociatat në vijim mes SHBA-ve dhe zyrtarëve ukrainas për arritjen e një marrëveshjeje që synon garantimin e sigurisë së Ukrainës pas luftës.

Kater liderët morën pjesë rreth dy javë më parë në një takim virtual të “koalicionit të vullnetarëve”, ku u diskutuan planet për krijimin e një force paqeruajtëse evropiane që mund të dislokohej në Ukrainë në rast të një armëpushimi.

Në një deklaratë lidhur me Samitin e Këshillit të Evropës, liderët shprehën mbështetje për deklaratat e Presidentit amerikan Trump, i cili tha se linja aktuale e kontaktit duhet të shërbejë si pika fillestare për çdo negociatë.

Ndërkohë, zyrtarët e SHBA-ve dhe Ukrainës zhvillojnë prej tre ditësh bisedime në Florida, pas presionit të administratës Trump që Kievi të pranojë një plan paqeje të mbështetur nga SHBA-të.

Presidenti rus Vladimir Putin hodhi poshtë disa pjesë të planit, duke theksuar se masat që synojnë garantimin e integritetit territorial të Ukrainës dhe pengimin e agresionit të ardhshëm rus përbëjnë një problem serioz për Moskën.

Starmer, i cili ka theksuar shpesh se Ukraina duhet të përcaktojë vetë të ardhmen e saj, tha se koalicioni i vullnetarëve për krijimin e një force paqeruajtëse do të luajë “një rol jetik” për sigurinë e vendit.