Albania News Agency

Sipas The Guardian, forcat izraelite ndërhynë ndaj disa anijeve të flotiljes pro-palestineze rreth 75 milje nga brigjet e Gazës. Anijet po përpiqeshin të thyenin bllokadën detare të vendosur mbi rajonin e dëmtuar nga lufta dhe të sillnin ndihma.

Bastisja filloi me anijen kryesore Alma, ekuipazhi i së cilës u arrestua të mërkurën nga ushtarët izraelitë. Në një video nga Ministria e Jashtme izraelite shihej aktivistja suedeze për klimën Greta Thunberg, një nga pasagjerët më të njohur të flotiljes, e ulur në kuvertë e rrethuar nga ushtarë.

Sipas të dhënave të vetë flotiljes, deri të enjten në mëngjes ishin ndaluar ose kapur gjithsej 13 anije. Por organizatorët thanë se anijet e mbetura “do të vazhdojnë rrugën e tyre” dhe ndodheshin 46 milje detare (85 km) nga destinacioni. Para ndërhyrjes, Thunberg publikoi një video në Instagram: “Emri im është Greta Thunberg. Jam në bordin e anijes Alma. Do të ndalohemi nga Izraeli.”

Flotilja publikoi në Telegram disa video me mesazhe nga persona në anije të ndryshme. Në këto mesazhe, disa duke mbajtur pasaportat e tyre, thoshin se ishin rrëmbyer dhe po dërgoheshin në Izrael kundër dëshirës së tyre, ndërsa misioni i tyre ishte thjesht humanitar dhe paqësor.