Albania News Agency

Kjo takim zhvillohet një ditë pas deklaratës së Trump se gjatë bisedës telefonike me presidentin rus Vladimir Putin është arritur “përparim i madh” dhe se të dy kanë rënë dakord të takohen personalisht në Hungari.

Trump theksoi se ky ishte kontakti i tij i parë me Putinin që nga mesi i gushtit, duke e përshkruar si “shumë produktiv”, dhe shtoi se ekipet nga Uashingtoni dhe Moska do të takohen javën e ardhshme.

Zelensky, i cili po qëndron në SHBA për herë të tretë që nga janari, tha pas mbërritjes se Moska “nxiton të rifillojë dialogun sapo mori vesh për raketat Tomahawk.”

Ai i bëri thirrje SHBA-së të furnizojë Ukrainën me raketa moderne me rreze veprimi 2500 kilometra (1500 milje).

I pyetur në fillim të javës nëse do t’i dërgonte Ukrainës raketa Tomahawk, Trump u përgjigj: “Do të shohim... Mund ta mendoj.”

Megjithatë, pas bisedës me Putinin, kur u pyet për të njëjtën mundësi, Trump tha: “Nuk mund të shterojmë rezervat tona të Tomahawkëve. Edhe ne i duam ato... Prandaj nuk e di çfarë do të bëjmë.”

Pas bisedës me Putinin, Trump shkroi në platformën Truth Social se ai dhe presidenti rus “diskutuan gjatë për tregtinë midis Rusisë dhe SHBA-së pas përfundimit të luftës në Ukrainë.”

Ai shtoi se “këshilltarë të lartë” nga të dy vendet do të takohen javën e ardhshme në një vend të pacaktuar, me delegacionin amerikan të kryesuar nga Sekretari i Shtetit, Marco Rubio.

Trump po ashtu tha se të premten do ta informojë Zelenskyn për bisedën me Putinin, duke shtuar: “Besoj se sot kemi arritur përparim të madh.”

Më vonë, ai u tha gazetarëve se pret të takohet me Putinin “brenda dy javësh” në Hungari.