Albania News Agency

Aksionet e kompanisë kryesore Critical Metals janë rritur me 241 % gjatë tre muajve të fundit, ndërsa ato të NioCorp Developments, Energy Fuels dhe Idaho Strategic Resources janë rritur mbi 100 % në të njëjtën periudhë.

Këto rritje “mahnitëse” janë bërë edhe më të dukshme që nga fillimi i vitit. Çmimi i aksioneve të Energy Fuels është katërfishuar në dhjetë muajt e parë të vitit, ndërsa ai i NioCorp Developments është rritur pothuajse pesëfish.

Elementet e tokave të rralla janë bërë një armë e rëndësishme negociuese në rivalitetin e vazhdueshëm gjeopolitik midis dy ekonomive më të mëdha të botës – SHBA dhe Kinës.

Drejtori ekzekutiv i Critical Metals, Tony Sage, kompania e të cilit zotëron një nga depozitat më të mëdha të elementeve të rralla në jug të Grenlandës, e përshkroi rritjen e minatorëve amerikanë si provë të një shpërthimi të madh të tregut.

Elementet e tokave të rralla përfshijnë 17 elementë të tabelës periodike që kanë një strukturë atomike të veçantë që u jep atyre veti magnetike unike. Këto materiale janë përbërës thelbësorë për teknologjitë moderne, nga telefonat inteligjentë te automjetet elektrike dhe pajisjet ushtarake.

Kina, e cila ka pothuajse monopol në treg, ka kërcënuar të zgjerojë kontrollet e eksportit për të forcuar dominimin e saj në zinxhirin e furnizimit. Megjithatë, pas takimit ballë për ballë ndërmjet presidentit amerikan Donald Trump dhe liderit kinez Xi Jinping të enjten në Korenë e Jugut, Pekini pranoi të shtyjë për një vit kontrollet e planifikuara për 9 tetor.

Pasi kjo lajm u publikua, aksionet e kompanive amerikane të elementeve të rralla u rritën, megjithatë analistët mbeten skeptikë nëse “armëpushimi tregtar” do të ofrojë një lehtësim afatgjatë.