Albania News Agency

Sipas vendimit të gjyqtarit Alexandre de Moraes të hënën, lideri i ekstremit të djathtë kishte shkelur ndalimin e përdorimit të rrjeteve sociale të vendosur muajin e kaluar.

Moraes shkroi se të dielën, ndërsa protestuesit në shumë qytete dolën në mbështetje të ish-presidentit, aleatët e Bolsonaros përdorën llogaritë në rrjetet sociale për të "nxisur dhe inkurajuar hapur sulmet ndaj Gjykatës së Lartë Federale dhe për të mbështetur ndërhyrjen e huaj në sistemin gjyqësor brazilian".

Gjyqtari, i cili u sanksionua nga SHBA javën e kaluar për rolin e tij në çështjen e Bolsonaros, urdhëroi që ai të vendoset në arrest shtëpiak në një vilë me palma në jug të kryeqytetit Brasilia. Vizitat lejohen vetëm për familjarët e ngushtë dhe avokatët.

Policia federale mori urdhër të konfiskojë të gjitha telefonat celularë që ndodheshin në vilë.

Vizitorëve të autorizuar për të takuar ish-presidentin nuk do t’u lejohet përdorimi i celularëve apo realizimi i fotografive dhe videove.

Zëdhënësi i Bolsonaros konfirmoi të hënën në mbrëmje se telefoni i tij u konfiskua nga policia dhe se ai ishte vendosur në arrest shtëpiak në rezidencën e tij në Brasilia.

Avokatët e Bolsonaros thanë se ai nuk ka shkelur asnjë vendim gjyqësor dhe do ta apelojnë vendimin.