Albania News Agency

Këngëtari i "Born to Run", Bruce Springsteen, lavdëroi përkushtimin e Harris dhe Tim Walz ndaj "vizionit për Amerikën", për të cilin thotë se ka shkruar për 55 vjet.

Springsteen, që ishte mbështetës i hapur i fushatave presidenciale të Barack Obama dhe Joe Biden, u bë mbështetësi më i fundit i profilit të lartë i Harris-it, duke iu bashkuar Taylor Swift-it, Oprah Winfrey-t dhe Barbra Streisand-it.

Në një video, ai lavdëroi Harris-in dhe Walz-in për përkushtimin e tyre ndaj një vendi që "përfshin dhe respekton të gjithë, pavarësisht klasës, fesë, racës, pikëpamjeve politike apo identitetit seksual, dhe që dëshiron të zhvillojë ekonominë në dobi të të gjithëve, jo vetëm për disa si unë."

"Ky është vizioni për Amerikën, për të cilin kam shkruar për 55 vjet," shtoi ai.

Ai theksoi se Trump-i "nuk e kupton domethënien e këtij vendi, historinë e tij apo thellësinë e asaj çfarë do të thotë të jesh amerikan".

"Përçmimi i tij ndaj shenjtërisë së Kushtetutës sonë, demokracisë, sundimit të ligjit dhe transferimit paqësor të pushtetit duhet ta diskualifikojë atë përgjithmonë nga presidenca," tha ai.

Springsteen e përfundoi fjalimin me: "Tani, të gjithë i shohin gjërat ndryshe dhe si një qytetar respektoj zgjedhjen tuaj. Por edhe unë, si ju, kam vetëm një votë dhe kjo është një nga gjërat më të çmuara që kam. Prandaj, më 5 nëntor, do të jap votën time për Kamala Harris dhe Tim Walz. Faleminderit që më dëgjuat."