Albania News Agency

Kryeministri i Francës François Bayrou do të dorëzojë dorëheqjen të martën pasi humbi votëbesimin që çoi në rrëzimin e qeverisë dhe në një krizë politike.

Emmanuel Macron deklaroi se në ditët e ardhshme do të emërojë një kryeministër të ri, i cili do të duhet të formojë një qeveri të re. Ky do të jetë kryeministri i tretë i Francës brenda një viti dhe detyra e tij e parë do të jetë arritja e një marrëveshjeje mbi buxhetin në një parlament të ndarë.

Të hënën në mbrëmje, francezët festuan rrëzimin e Bayrou përpara bashkive në mbarë vendin me gota nën moton “Bye bye Bayrou”.

Shumica e pjesëmarrësve e shfrytëzuan këtë tubim për të planifikuar një ditë proteste të mërkurën me emrin “Blloko gjithçka”. Protestat mund të çojnë në barrikada rrugësh dhe bllokimin e depozitave të karburantit, me rreth 80 mijë policë të mobilizuar.

Që kur presidenti i Francës bëri thirrje për zgjedhje të parakohshme vitin e kaluar, parlamenti është ndarë në tre grupe – të majtë, centristë dhe të djathtë ekstrem – pa një shumicë absolute. Ende mbetet e paqartë se kush do të arrijë kompromis për buxhetin dhe nëse do të shmangë një tjetër shkarkim. Bayrou 74-vjeçar, centrist, qëndroi në detyrë për nëntë muaj përpara se të shkarkohej për shkak të buxhetit jopopullor për uljen e borxhit. Përpara tij, politikani i djathtë Michel Barnier qëndroi vetëm tre muaj përpara se të shkarkohej gjithashtu për shkak të buxhetit.

Ndër kandidatët e mundshëm përmendet ish-kryeministri dhe ish-anëtar i Partisë Socialiste Bernard Cazeneuve, i cili mund të pranohet si nga socialistët ashtu edhe nga centristët e Macron.

Një tjetër kandidat i mundshëm është ministri i Financave Eric Lombard, ish-menaxher banke dhe gjithashtu ish-anëtar i Partisë Socialiste.