Albania News Agency

Grupet për të drejtat e grave e përshkruan miratimin e ligjit të ri si një hap historik, ndërsa Partia Demokratike në opozitë dhe grupet "pro-familje" e cilësuan atë si një sulm ndaj vlerave tradicionale.

Ligji i ri, i miratuar të enjten, synon të përmirësojë dispozitat ekzistuese për barazinë gjinore, të ofrojë mbrojtje dhe garanci të reja për gratë dhe vajzat dhe të ndalojë çdo formë diskriminimi mbi bazën e gjinisë, identitetit gjinor apo karakteristikave seksuale.

Sipas ligjit, barra e provës në rastet e dhunës me bazë gjinore tashmë bie mbi autorin dhe jo mbi viktimën.

Për të rritur përfaqësimin e barabartë në proceset vendimmarrëse, ligji vendos kuota gjinore që variojnë nga 30% në 50% për gratë në parlament, qeveri, administratë publike, polici, shërbimin diplomatik dhe bordet e institucioneve publike.

Për herë të parë, puna e papaguar si kujdesi për fëmijët dhe të moshuarit njihet si kontribut ekonomik real, dhe qeveria detyrohet ta matë dhe ta përfshijë në politikat buxhetore.

Komisionerja e BE-së për Zgjerimin, Marta Kos, mirëpriti ndryshimet duke thënë në X të enjten se "barazia gjinore dhe mosdiskriminimi janë pjesë përbërëse e ligjit të BE-së". Shqipëria, nën qeverinë aktuale, synon të përshpejtojë anëtarësimin në BE.

Partia Demokratike, që përpiqet të pozicionohet si mbrojtëse e vlerave tradicionale, e kundërshton ligjin.

Në të njëjtën kohë, grupet "pro-familje", të mbështetura nga partitë kryesore opozitare, protestuan të enjten para parlamentit, duke pretenduar se ligji promovon "identitete të shumëfishta gjinore" dhe dëmton familjen tradicionale.

Që nga fillimi i fazës së konsultimeve, ligji ka shkaktuar debate të forta publike, ndërsa figurat fetare dhe grupet "pro-familje" pretendojnë se ligji "nxit gjini të reja".

Grupet e të drejtave e kundërshtojnë këtë interpretim dhe e mirëpresin ligjin e ri.