Albania News Agency

Vëzhgimi i planetit K2-18 b nga teleskopi hapësinor James Webb ka zbuluar gjurmë kimike të dy përbërjeve që në Tokë njihen si të prodhuara vetëm nga jeta.

Detektimi i dimetil sulfide (DMS) dhe dimetil disulfide (DMDS) nuk përbën provë të drejtpërdrejtë për aktivitet biologjik alien, por mund të na afrojë shumë më pranë përgjigjes ndaj pyetjes nëse jemi të vetëm në univers.

Prof. Nikku Madhusudhan nga Universiteti i Kembrixhit, që udhëhoqi vëzhgimet, tha: “Kjo është dëshmia më e fuqishme deri më sot për një aktivitet biologjik jashtë sistemit diellor. Jemi shumë të kujdesshëm. Duhet të pyesim veten nëse sinjali është real dhe çfarë nënkupton. Pas dekadash, mund të kthehemi pas dhe të kuptojmë se ky ishte momenti kur universi i gjallë u bë i arritshëm për ne. Ky mund të jetë një moment historik në përgjigjen e pyetjes nëse jemi të vetëm.”

K2-18 b, i cili ndodhet në yjësinë e Luanit, ka një masë rreth nëntë herë më të madhe se ajo e Tokës dhe madhësi 2.6 herë më të madhe, dhe rrotullohet në zonën e banueshme të një ylli xhuxh të kuq më të vogël se gjysma e Diellit. Kur teleskopi Hubble zbuloi avull uji në atmosferën e saj në vitin 2019, shkencëtarët e shpallën “botën më të banueshme të njohur” jashtë sistemit diellor.

Gjetjet e publikuara në Astrophysical Journal Letters tregojnë se përqendrimet e DMS, DMDS apo të dyjave janë mijëra herë më të larta se në Tokë. Rezultatet raportohen me rëndësi statistikore “tri sigma” (gjasa që të ndodhin rastësisht është 0.3%), por kjo ende nuk e përmbush standardin e artë për zbulim në fizikë.

Madhusudhan shtoi: “Mund të ketë procese që prodhojnë këto molekula që nuk i njohim. Por nuk njoh asnjë proces që mund ta shpjegojë këtë pa biologji.”