Albania News Agency

Aksionet e Trump Media and Technology Group ranë të mërkurën pasi kompania bëri një lëvizje që sugjeron se Trump mund të shesë aksionet e tij me vlerë 2 miliardë dollarë.

Të martën, kompania paraqiti një aplikim regjistrimi në Komisionin e Letrave me Vlerë dhe Shkëmbim (SEC), që do të lejonte shitjen e rreth 115 milionë aksioneve me vlerë mbi 2.3 miliardë dollarë.

Kjo lëvizje i lejon Trumpit të shesë aksionet e tij, por nuk e detyron ta bëjë këtë.

Sipas ABC News, Trump ia ka transferuar aksionet fondit besues të Donald J Trump, i cili kontrollohet nga djali i tij, Donald Trump Jr.

Nëse Trump i shet aksionet e tij, kjo mund të shkaktojë panik tek investitorët e tjerë dhe të çojë në një rënie të mëtejshme të çmimit të aksioneve.

Ditën e mërkurë, kompania publikoi një deklaratë duke e quajtur këtë lajm të rremë të sajuar nga mediat tradicionale.

“Mediat e vjetra po përhapin një lajm të rremë që pretendon se aplikimi i sotëm i TMTG hap rrugën për shitjen e aksioneve nga trusti i Trump. Për sqarim: këto aksione ishin regjistruar në formularin S-1 që në qershor, dhe regjistrimi i sotëm në formularin S-3 është vetëm një procedurë rutinë. Aktualisht nuk ka dritare të hapura për shitje aksionesh nga ndonjë palë.” thuhet në deklaratë.