Albania News Agency

Sipas deklaratës së Ministrisë, Araghchi bisedoi në telefon me Ministrin e Jashtëm të Indisë, Subrahmanyam Jaishankar.

Gjatë bisedës, Jaishankar shprehu ngushëllimet e thella të qeverisë dhe popullit indian për qeverinë dhe popullin iranian pas sulmeve izraelite.

Ministri i Jashtëm i Egjiptit, Bedr Abdulati, dënoi sulmet ushtarake të Izraelit ndaj Republikës Islamike të Iranit në një bisedë me Araghchin.

Ai theksoi se këto sulme po nxisin një përshkallëzim jashtëzakonisht të rrezikshëm rajonal dhe janë shkelje e qartë e së drejtës ndërkombëtare dhe Kartës së OKB-së, duke përbërë një kërcënim serioz për paqen dhe stabilitetin rajonal e ndërkombëtar.

Ministri i Jashtëm i GKRY-së, Konstantinos Kombos, zhvilloi gjithashtu një bisedë telefonike me Araghchin.

Kombos dënoi sulmet izraelite ndaj Iranit dhe bëri thirrje për përmbajtje dhe diplomaci për të parandaluar përshkallëzimin e mëtejshëm të tensioneve.

Zëvendëskryeministri dhe Ministri i Jashtëm i Pakistanit, Muhammed Ishak Dar, dënoi ashpër sulmet e Izraelit ndaj Iranit gjatë një telefonate me Araghchin.

Ai rikonfirmoi solidaritetin e qeverisë dhe popullit pakistanez me Iranin dhe shprehu shqetësim për ndikimet destabilizuese që këto veprime përfaqësojnë për rajonin.

Ministri i Jashtëm i EBA-së, Sheikh Abdullah Bin Zayed Al Nahyan, dënoi fuqishëm sulmet izraelite ndaj Republikës Islamike të Iranit dhe i quajti ato një shkelje të qartë të sovranitetit iranian, së drejtës ndërkombëtare dhe Kartës së OKB-së.

Ministri i Jashtëm britanik, David Lammy, dhe Araghchi diskutuan zhvillimet e fundit lidhur me agresionin izraelit ndaj Iranit.

Lammy shprehu keqardhjen për përshkallëzimin në rajon dhe shpresoi se të gjitha palët do të tregojnë përmbajtje dhe do të kërkojnë zgjidhje përmes diplomacisë.

Në kuadër të konsultimeve diplomatike, Araghchi bisedoi edhe me homologen australiane Penny Wong.

Araghchi shpjegoi përmasat e agresionit izraelit ndaj objektivave ushtarake dhe objekteve bërthamore iraniane dhe paralajmëroi për pasojat. Wong theksoi se këto zhvillime rrezikojnë të përkeqësojnë më tej paqen rajonale.