Albania News Agency

Policia suedeze vitet e fundit po lufton me shpërthime, tentativa vrasjesh dhe trafik droge. Fëmijët gjithashtu po inkurajohen të kryejnë krime në këmbim të parave.

Sipas një studimi të fundit të Policisë Kombëtare të Suedisë, në vend ka 17.500 anëtarë aktivë bandash dhe rreth 50.000 persona të tjerë që kanë lidhje të tërthorta me ta.

Drejtoresha e Përgjithshme e Policisë, Petra Lund, tha: “Është shumë. Këto janë grupe të mëdha me anëtarë aktivë dhe persona të lidhur me ta. Krahasuar me shifrat e një viti e gjysmë më parë, mund të themi se numri nuk është rritur.”

Ministri i Drejtësisë, Gunnar Strömmer, tha se harta konfirmon që bandat janë një problem i përhapur. Nga viti 2012 deri në 2022 numri i sulmeve me armë është trefishuar. Por shtoi se gjatë tre viteve të fundit ky numër ka rënë: “Është e qartë se mjetet, metodat dhe burimet e reja kanë filluar të japin efekt. Jemi në rrugën e duhur, por kemi ende shumë për të bërë.”

Drejtoresha e policisë shtoi se ashpërsimi i dënimeve nuk mjafton për të ulur krimin e bandave. “Ka institucione të tjera që merren me parandalimin e krimit dhe është e rëndësishme të ndalojmë fëmijët dhe të rinjtë të futen në këtë ambient. Ne besojmë se ndërhyrja e hershme është thelbësore – kjo është përgjegjësi kryesisht e bashkive, shkollave dhe, sigurisht, prindërve.”