Albania News Agency

Gazeta izraelite Ynet raportoi se zyrtarë të lartë pranë Netanyahut thanë: “Zarët janë hedhur – po synojmë pushtimin e plotë. Nëse Shefi i Shtabit nuk pajtohet, duhet të japë dorëheqjen.”

Kryeministri izraelit Benjamin Netanyahu është në favor të zgjerimit të operacioneve ushtarake, ndërsa Hamasi kërkon që situata humanitare të trajtohet para se të kthehet në bisedime.

Një burim i tha CNN-it se ministria e mbrojtjes kundërshton zgjerimin e operacioneve tokësore në zonat ku besohet se mbahen pengje, pasi kjo do t’i vinte ata në rrezik.

Një grup nënash ushtarësh izraelitë e kritikuan raportin, duke thënë se do të ishte fatal si për pengjet ashtu edhe për ushtarët. Autoriteti Palestinez bëri thirrje për ndërhyrje ndërkombëtare.

Kur u pyet për planet e zgjerimit të ofensivës, ministri i Jashtëm izraelit Gideon Sa’ar tha të hënën se kjo pasqyron “dëshirën për t’i dhënë fund kësaj lufte pas dështimit të bisedimeve për një marrëveshje të pjesshme dhe kthimit të të gjithë pengjeve”.

Mbetej e paqartë nëse qëndrimi i qeverisë izraelite përputhej me atë të përfaqësuesit të Trump-it për Lindjen e Mesme, Steve Witkoff.