Albania News Agency

Në raport thuhet: “Salvan Momika, i cili dogji Kuranin, u qëllua për vdekje të mërkurën vonë në Södertälje”.

Gjykata e Stokholmit pritej që të enjten ta dënonte Momikën për nxitje të urrejtjes mbi bazën e kombësisë.

Zëdhënësi i policisë, Daniel Wikdal, tha se pas një sulmi me armë të ndodhur të mërkurën në Södertälje, policia dhe ambulancat u thirrën në vendngjarje. Një person u gjet i qëlluar brenda një apartamenti. Sipas burimeve, viktima ishte 38-vjeçari Momika.

Policia arrestoi pesë persona në kuadër të hetimeve paraprake për vrasjen.

Sipas gazetës Expressen, Momika po transmetonte drejtpërdrejt në TikTok pak para se të vritej. Disa pjesë të ngjarjeve mund të jenë regjistruar live.

Emigranti irakian Momika kishte organizuar disa protesta për djegien e Kuranit në Suedi, përfshirë një në xhaminë kryesore të Stokholmit në ditën e parë të Bajramit të Kurbanit.