Albania News Agency

Plani parashikon gjithashtu krijimin e një Forcë Ndërkombëtare të Stabilitetit (ISF), për të cilën, sipas SHBA-së, disa vende – emrat e të cilave nuk janë bërë publikë – janë ofruar të japin kontribut.

Rezoluta u mbështet nga 13 vende, mes tyre Britania e Madhe, Franca dhe Somalia, pa asnjë votë kundër. Rusia dhe Kina abstenuan.

Zëdhënësi i Sekretarit të Përgjithshëm të OKB-së Antonio Guterres e quajti miratimin e rezolutës “një hap të rëndësishëm në konsolidimin e armëpushimit”. Ndërkohë, Hamasi e hodhi poshtë vendimin, duke deklaruar se ai nuk i plotëson të drejtat dhe kërkesat e palestinezëve.

Pas miratimit të rezolutës, Hamasi publikoi një deklaratë në Telegram, ku thuhej se plani “i imponon Rripit të Gazës një mekanizëm ndërkombëtar kujdestarie dhe populli ynë dhe përkrahësit tanë e refuzojnë atë”.

Hamasi shtoi: “Dhënia e detyrave dhe roleve një force ndërkombëtare në Rripin e Gazës, duke përfshirë çarmatosjen e rezistencës, e privon atë nga neutraliteti dhe e kthen në pjesë të konfliktit në favor të okupimit.”

Sipas rezolutës, ISF do të punojë së bashku me Izraelin dhe Egjiptin, si dhe me një forcë të re policore palestineze të trajnuar dhe të mbikëqyrur, për të siguruar sigurinë e zonave kufitare dhe për të garantuar procesin e çarmatosjes së përhershme të grupeve të armatosura jo-shtetërore, përfshirë Hamasin.

Deritanitë, policia në rajon vepronte nën autoritetin e Hamasit.

Këshilli i Sigurimit miratoi gjithashtu krijimin e një organi të përkohshëm qeverisës të quajtur “Bordi i Paqes” (BoP), i cili do të mbikëqyrë komitetin teknokratik dhe jopolitik palestinez dhe do të monitorojë rindërtimin e Gazës dhe shpërndarjen e ndihmës humanitare.

Sipas rezolutës, financimi i rindërtimit të Gazës pas luftës dyvjeçare do të sigurohet nga një fond i besuar i mbështetur nga Banka Botërore.

Sipas dokumentit, si ISF, ashtu edhe BoP do të punojnë së bashku me një komitet palestinez dhe me forcat policore.

Në platformën Truth Social, Trump shkroi: “Kjo do të hyjë në histori si një nga miratimet më të mëdha në historinë e Kombeve të Bashkuara, do të sjellë më shumë paqe në mbarë botën dhe është me të vërtetë një moment historik!”

Në ndryshim nga projekt-rezolutat e mëparshme, teksti aktual i referohet një rruge të besueshme drejt ushtrimit nga palestinezët të së drejtës së tyre për vetëvendosje dhe krijimin e një shteti – formulim që mbështetet nga disa anëtarë të Këshillit.

Izraeli kundërshton ashpër krijimin e një shteti palestinez, gjë që përbën një pengesë madhore në rrugën drejt shtetësisë së ardhshme. Disa shtete të rëndësishme arabe kanë ushtruar presion mbi hartuesit e rezolutës që e drejta e palestinezëve për vetëvendosje të përfshihet në tekst.