Albania News Agency

Presidenti rus tha se në ditën e Krishtlindjes vitin e kaluar, raketat e lëshuara nga sistemet ruse të mbrojtjes ajrore shpërthyen pranë avionit të Azerbaijan Airlines, i cili ishte nisur nga Baku dhe po përgatitej të ulej në Grozni, kryeqytetin rajonal të Çeçenisë. Raketat kishin si objektiv një dron ukrainas.

Putin tha: “Dy raketat e lëshuara nuk e goditën drejtpërdrejt avionin; po ta kishin goditur, ai do të ishte shkatërruar plotësisht. Ato shpërthyen rreth dhjetë metra larg për vetë-shkatërrim.”

“Dëmi u shkaktua jo nga kokat luftarake, por ka shumë gjasa nga mbeturinat e vetë raketave. Prandaj piloti mendoi se kishte goditur një tufë zogjsh dhe raportoi incidentin tek kontrollorët rusë të trafikut ajror – gjithçka u regjistrua në ‘kutitë e zeza’.”

Putin paralajmëroi se hetimi i plotë i aksidentit “ndoshta do të marrë pak më shumë kohë”.

Autoritetet azere kishin njoftuar më parë se avioni ishte qëlluar gabimisht nga zjarri i mbrojtjes ajrore ruse.

Avioni, i cili po përpiqej të ulej në Kazakistanin Perëndimor, u rrëzua duke shkaktuar vdekjen e 38 nga 67 pasagjerët në bord.

Disa ditë më vonë, Putin i kërkoi falje Aliyevit për “një aksident tragjik”, por nuk mori përgjegjësi.

Aliyev akuzoi Moskën për përpjekje për ta “fshehur” ngjarjen.

Megjithatë, të enjten, ai falënderoi Putinin për ndjekjen personale të hetimit.

Aliyev tha: “Dua të shpreh edhe një herë mirënjohjen time që e ngritët këtë çështje gjatë takimit tonë.”