Albania News Agency

Presidenti i Rusisë, Vladimir Putin, u takua me Presidentin e Republikës së Serbisë, Aleksandar Vuçiç, i cili mori pjesë në ceremoninë e 80-vjetorit të fitores së popullit kinez në Luftën e Rezistencës kundër Japonisë dhe përfundimit të Luftës së Dytë Botërore.

Putin theksoi se partneriteti strategjik midis Rusisë dhe Serbisë sjell përfitime reciproke dhe rezultate pozitive si për Rusinë, ashtu edhe për Serbinë: “Vitine kaluar, për fat të keq, pati një rënie të tregtisë. Por këtë vit shohim dinamika pozitive dhe detyra jonë është ta forcojmë atë.”

Ai theksoi gatishmërinë për të vazhduar bashkëpunimin në fushën tregtare dhe ekonomike, duke shtuar: “Ne e shohim dhe e respektojmë politikën e jashtme të pavarur që ndjek Serbia nën udhëheqjen tuaj. Jam i lumtur që sot kemi mundësi të flasim si për çështje dypalëshe, ashtu edhe rajonale.”

Presidenti i Serbisë, Aleksandar Vuçiç, nga ana e tij theksoi rëndësinë e bashkëpunimit të nivelit të lartë me Rusinë në të gjitha fushat: “Shpresoj që të kemi mundësi jo vetëm të vazhdojmë, por edhe të forcojmë dhe zgjerojmë bashkëpunimin tonë. Për vendin tonë, sektori i energjisë dhe furnizimi me gaz kanë rëndësi jetike. Falë ndërtimit të tubacionit të naftës drejt Hungarisë, do të bëjmë hapa përpara në zhvillimin e sektorit të energjisë.”

Vuçiç falënderoi kompanitë ruse, përfshirë Hekurudhat Ruse dhe Rosatom, për interesin e tyre në projektet infrastrukturore në Serbi: “Zoti President, dua të theksoj edhe një herë se që nga fillimi i krizës së Ukrainës, Serbia ka qenë në një situatë shumë të vështirë dhe nën presion të madh. Por megjithatë, arritëm të ruanim qëndrimin tonë parimor dhe të mbronim pavarësinë e Serbisë. Sot, ne jemi i vetmi vend në Evropë që nuk ka vendosur sanksione ndaj Federatës Ruse. Dhe, sigurisht, në të ardhmen do të ruajmë neutralitetin tonë ushtarak.”