Albania News Agency

Sipas dokumenteve të siguruara nga Politico, shumica e punonjësve që do të largohen janë në nivelet më të larta të administratës qeveritare, duke e privuar agjencinë nga përvoja disa dekadëshe si pjesë e përpjekjeve për të zvogëluar madhësinë e qeverisë federale përmes pensioneve të parakohshme, blerjeve vullnetare dhe dorëheqjeve të shtyra.

Dokumentet tregojnë se 1,818 prej tyre aktualisht punojnë në fusha thelbësore si shkenca apo fluturimet hapësinore me njerëz, ndërsa të tjerët janë të angazhuar në role mbështetëse si teknologjia e informacionit apo IT.

Që kur Trump është kthyer në detyrë në janar, industria hapësinore amerikane dhe forca punëtore 18 mijë anëtarëshe e NASA-s janë zhytur në kaos për shkak të planifikimit, largimeve nga puna dhe shkurtimeve të propozuara buxhetore për vitin fiskal 2026, të cilat do të anulojnë dhjetëra programe shkencore.

Javën e kaluar, shtatë ish-drejtorë të Drejtorisë së Misionit Shkencor të NASA-s nënshkruan një letër të përbashkët drejtuar Kongresit, duke dënuar propozimin e Shtëpisë së Bardhë për një ulje prej 47% në aktivitetet shkencore të NASA-s në buxhetin e vitit 2026. Në letër, ish-zyrtarët i bënë thirrje komitetit të buxhetit të Dhomës së Përfaqësuesve që “të ruajë udhëheqjen e SHBA-së në eksplorimin hapësinor dhe të refuzojë shkurtime të paprecedenta në shkencën hapësinore të propozuara nga drejtori i buxhetit të Shtëpisë së Bardhë, Russ Vought.”