Albania News Agency

Ministri i Jashtëm i Iranit, Abbas Araghchi, konfirmoi në platformën sociale X se përfaqësuesit e SHBA-së dhe Iranit do të takohen të dielën në kryeqytetin e Omanit, Maskat, për të diskutuar programin bërthamor të Iranit.

Më herët gjatë ditës, Presidenti amerikan Donald Trump kishte shpallur në një takim në Shtëpinë e Bardhë me Kryeministrin izraelit Benjamin Netanyahu se bisedimet janë planifikuar.

Araghchi dhe Trump nuk ranë dakord nëse bisedimet do të jenë të drejtpërdrejta apo të tërthorta. Araghchi theksoi në postimin e tij se ato do të jenë bisedime të tërthorta përmes ndërmjetësuesve, ndërsa Trump i quajti ato bisedime të drejtpërdrejta. Araghchi dhe përfaqësuesi i posaçëm i Trump për Lindjen e Mesme, Steve Witkoff, do të kryesojnë delegacionet.

SHBA dhe Izraeli janë të vendosur që Irani të mos zhvillojë armë bërthamore dhe Trump tha se, nëse nuk arrihet një marrëveshje, ai mund të konsiderojë sulm ndaj Iranit. “Nëse bisedimet me Iranin nuk rezultojnë me sukses, mendoj se Irani do të përballet me një rrezik të madh, dhe më vjen keq, por është një rrezik i madh, sepse ata nuk mund të kenë armë bërthamore”, tha Trump.

SHBA arriti një marrëveshje me Iranin për programin e tij bërthamor në vitin 2015 gjatë presidencës së Barack Obamës. Marrëveshja parashikonte lehtësimin e disa sanksioneve ekonomike ndaj Iranit në këmbim të kufizimeve ndaj programit të tij bërthamor. Trump u tërhoq nga marrëveshja në vitin 2018 dhe rivendosi sanksionet ekonomike ndaj Iranit.