Albania News Agency

Sipas autoriteteve shtetërore, agresori i armatosur, pasi qëlloi një oficer policie, u largua drejt Kishës Baptiste Richmond Road, ku ndodhi një tjetër sulm.

Shefi i Policisë së Lexington-it, Lawrence Weathers, tha se agresori i panjohur sulmoi një oficer të Policisë Shtetërore të Kentakit në orën 11:36 në rrugën drejt terminalit të Aeroportit Blue Grass. Oficeri e ndaloi sulmuesin pas një paralajmërimi nga lexuesi i targave.

Weathers tha: "Oficeri u qëllua dhe i dyshuari u arratis," duke shtuar se oficeri është në gjendje stabile dhe po trajtohet.

Weathers shtoi se forcat e rendit e gjetën sulmuesin në Kishën Baptiste në Richmond Road, rreth 26 km në juglindje, ku ai hapi zjarr përsëri.

Policia e qëlloi për vdekje agresorin, por ai kishte vrarë dy persona dhe kishte plagosur të paktën edhe dy të tjerë në kishë.

“Informacionet paraprake tregojnë se i dyshuari mund të ketë pasur lidhje me personat në kishë. Katër persona u qëlluan në pronën e kishës,” tha Weathers.

Ai shtoi se njëri nga dy meshkujt e plagosur është në gjendje kritike, ndërsa tjetri në gjendje stabile.