Albania News Agency

Trump e bëri të ditur këtë veprim përmes një postimi në rrjetet sociale, pa saktësuar se ku do të dërgoheshin nëndetëset apo çfarë kapacitetesh kanë ato.

"Për shkak të deklaratave jashtëzakonisht provokuese të zëvendëskryetarit të Këshillit të Sigurisë së Federatës Ruse, Dmitry Medvedev, i cili është edhe ish-president i Federatës Ruse, kam urdhëruar vendosjen e dy nëndetëseve bërthamore në zona të përshtatshme, në rast se ka më shumë deklarata të tilla të pamenduara dhe provokuese", shkroi Trump.

"Fjalët kanë rëndësi dhe shpesh mund të çojnë në pasoja të papritura. Shpresoj që kjo të mos jetë një prej tyre", shtoi ai.

Trump foli më shumë për këtë çështje pasdite kur po largohej nga Shtëpia e Bardhë.

“Na duhej ta bënim këtë. Thjesht duhet të jemi të kujdesshëm. U bë një kërcënim dhe ne nuk e konsideruam të përshtatshëm. Kështu që duhet të jem shumë i kujdesshëm. E bëj këtë për sigurinë e popullit tonë”, tha ai për gazetarët.

"Një ish-president rus bëri një kërcënim dhe ne do të mbrojmë popullin tonë", shtoi ai.

Shtëpia e Bardhë nuk dha detaje për kohën e vendosjes së nëndetëseve, misionin e tyre apo nëse ato janë të armatosura me armë bërthamore apo thjesht të fuqizuara me energji bërthamore.

Një zyrtar i Shtëpisë së Bardhë tha se kjo është pjesë e një strategjie "pasigurie strategjike" dhe refuzoi të japë më shumë detaje.

Departamenti i Mbrojtjes gjithashtu nuk dha informacion, duke i drejtuar të gjitha pyetjet e gazetarëve te Shtëpia e Bardhë.