Albania News Agency

Organizatorët e flotës Sumud, që transporton ndihma për Gazën, thanë se besojnë që anija e tyre kryesore u sulmua dje nga një dron. Anija ishte ankoruar rreth 80 km larg portit Sidi Bou Said në Tunizi, ndërsa udhëtonte nga Spanja drejt Gazës gjatë fundjavës.

Në një deklaratë të bërë në rrjetet sociale u theksua se të gjithë organizatorët kryesorë të udhëtimit ishin në bord dhe shumë prej tyre ishin figura të njohura. Aktivistja suedeze e klimës Greta Thunberg është ndoshta më e njohura prej tyre.

Mendohet se nuk pati të lënduar në bord. Garda Kombëtare Tuniziane konfirmoi se kishte shpërthyer zjarr në jelekët e shpëtimit të anijes, por nuk gjeti shenja të aktivitetit të dronëve.

Garda Kombëtare beson se spekulimet për një sulm me dron janë të pabazuara dhe në rrjetet sociale është sugjeruar se zjarri u shkaktua nga një bisht cigareje. Megjithatë, hetimi vazhdon.

Nisja e flotës Sumud nga Tunizia u shty për disa ditë. Flota synon të thyejë bllokadën izraelite të Gazës dhe të dërgojë ndihma të ndryshme për popullsinë e prekur nga lufta. Kombet e Bashkuara kanë shpallur zyrtarisht urinë në disa zona të Gazës dhe vlerësojnë se të paktën gjysmë milioni njerëz po jetojnë në kushte të vështira.

Aktivistët e përshkruajnë flotën si një komunitet të pavarur nga çdo qeveri ose parti politike. Fjala arabe Sumud do të thotë qëndrueshmëri.