Albania News Agency

Zyrtari amerikan tha se me grumbullimin e forcave amerikane në rajon – përfshirë aeroplanmbajtësen më të avancuar amerikane dhe 15.000 personel – Trump shpreson të ushtrojë mjaftueshëm presion ndaj presidentit venezuelian Nicolás Maduro që ai të japë dorëheqjen pa ndërhyrje të drejtpërdrejtë ushtarake.

Javën e kaluar Trump mori brifingje për tre ditë radhazi mbi opsionet ushtarake. Opsionet varionin nga sulme ndaj objekteve ushtarake dhe qeveritare deri te operacione speciale. Edhe opsioni “të mos bëhet asgjë” mbetet i mundshëm.

Presidenti shprehu disa hezitime për një ndërhyrje të drejtpërdrejtë tokësore brenda Venezuelës. Ai vuri në dyshim rreziqet për trupat amerikane dhe gjasat e suksesit.

Trump po dëgjon gjithashtu edhe kritikat e reja nga disa aleatë që thonë se ai po fokusohet tepër në çështjet ndërkombëtare në vend të atyre të brendshme.

Ende nuk dihet qartë se çfarë sinjalesh ka marrë administrata për gatishmërinë e Maduros për një raund të ri diplomacie. Muajin e kaluar, ndërsa përpjekjet e heshtura për një marrëveshje me Karakas vazhdonin, Trump i kishte urdhëruar ndihmësit e tij të ndërprisnin komunikimet diplomatike me Maduro dhe zyrtarë të tjerë venezuelianë.

Në atë kohë Trump dhe zyrtarët e lartë ishin të zhgënjyer që Maduro nuk pranoi të jepte dorëheqjen vullnetarisht.