Albania News Agency

Në një deklaratë që shkaktoi tronditje brenda institucionit, Davie tha se dorëheqja e tij ishte “plotësisht vendimi i tij personal” dhe ndodhi në një moment kur BBC po përgatitej të kërkonte falje për mënyrën se si kishte montuar një fjalim të Trumpit.

Drejtoresha e lajmeve të BBC-së, Deborah Turness, gjithashtu dha dorëheqjen. Burime brenda departamentit thanë se largimi i saj ishte “shumë i trishtueshëm”. Një prej tyre tha: “Ndjehet si një goditje.” “Kjo është pasojë e një fushate të udhëhequr nga armiqtë politikë të BBC-së.”

Komiteti i Dhomës së Komunave për Kulturën, Mediat dhe Sportin i kishte dhënë BBC-së afat deri të hënën për t’iu përgjigjur pretendimeve të Michael Prescott, ish-këshilltar i pavarur i komisionit të standardeve të transmetimit të BBC-së. Prescott ishte larguar nga detyra gjatë verës.

Prescott kritikoi një numër të revistës *Panorama* që përmbante një version të redaktuar të fjalimit të Trumpit të 6 janarit 2021. Montazhi jepte përshtypjen se Trump u tha mbështetësve: “Do të marshojmë drejt Kongresit, unë do të jem me ju dhe do të luftojmë. Do të luftojmë si në ferr.”

Këto fjali ishin nxjerrë nga pjesë të ndryshme të fjalimit, me diferencë rreth një ore. Kjo solli kritika nga zëdhënësja e Trumpit, Karoline Leavitt, e cila e quajti BBC-në “100% lajme të rreme” dhe “makinë propagandistike”.

Mbrëmë, Leavitt festoi dorëheqjet duke shkruar në X se BBC mori atë që meritonte për qëndrimin ndaj fjalimit të presidentit amerikan.

Trump shkroi në Truth Social se “njerëz shumë të pandershëm” po përpiqeshin “të ndikojnë në peshoren e Zgjedhjeve Presidenciale”, duke shtuar: “Më e keqja është se ata vijnë nga një vend i huaj që shumë e shohin si aleatin tonë numër një. Sa e tmerrshme për demokracinë!”