Albania News Agency

Pas takimit me Kryeministrin belg Bart De Wever, Presidenti francez Emmanuel Macron theksoi se Bashkimi Evropian duhet të veprojë i bashkuar përballë sfidave të mëdha. Macron e përshkroi takimin si një "shkëmbim shumë i mirë" dhe rikonfirmoi vendosmërinë e përbashkët të dy vendeve për të forcuar sovranitetin, sigurinë dhe konkurrueshmërinë.

Sa i përket luftës në Ukrainë, Macron deklaroi: "Qëllimi ynë është i qartë: të arrijmë një armëpushim të plotë dhe të qëndrueshëm dhe të ndërtojmë një marrëveshje të fortë paqeje në interes të Ukrainës dhe Evropës." Ai shtoi se puna në këtë drejtim po vazhdon me Belgjikën dhe partnerët e tjerë në kuadër të koalicionit të vullnetarëve të nisur më 27 mars në Paris.