Albania News Agency

Fjalimi i Booker përfundoi pas 25 orë e 5 minutash. Filloi të hënën në orën 19:00 dhe nuk ishte për të bllokuar Senatin, por për të paralajmëruar për rrezikun “të madh dhe urgjent” që përfaqëson sipas tij administrata e Donald Trump për demokracinë dhe popullin amerikan.

“Ngrihem me qëllimin për të ndërprerë funksionimin normal të Senatit të Shteteve të Bashkuara për aq kohë sa është fizikisht e mundur. Ngrihem këtë natë sepse besoj sinqerisht se vendi ynë është në krizë,” tha Booker në fillim të fjalës së tij.

Senatori demokrat foli për veprimet e administratës Trump që, sipas tij, përbëjnë shkelje të Kushtetutës së SHBA-së.

“Kjo nuk është çështje e së djathtës apo së majtës. Mos lejoni që ta quajnë politikë partizane. Nuk është. Është çështje e të drejtës dhe të gabuarës. Amerika, kjo është një moment moral. A jeton Kushtetuta në zemrën tuaj?”

Ndër temat që kritikoi ishte edhe roli i këshilltarit të Trumpit, Elon Musk, në anulimin e disa projekteve publike pa miratimin e Kongresit.

Booker qëndroi në këmbë gjatë gjithë kohës, pa mundësi për të shkuar në tualet. Në fund bëri edhe një shaka: “Thjesht dua të përfundoj këtë dhe pastaj të plotësoj disa nevoja fizike që ndiej.”

Rekordi i mëparshëm mbahej nga senatori i Karolinës së Jugut, Strom Thurmond, i cili në vitin 1957 foli për 24 orë kundër një projektligji për të drejtat civile për afrikano-amerikanët.