Albania News Agency

Presidenti amerikan Donald Trump, pas takimit me Kryetarin e Bashkisë së New York-ut, Zohran Mamdani, mbajti një konferencë të përbashkët për shtyp. Në deklaratën e tij, ai theksoi se çmimet janë ulur ndjeshëm krahasuar me vitin e kaluar, duke thënë: “E kemi thënë shumë herë se çmimet në treg kanë rënë me 25 për qind në krahasim me vitin e kaluar. Dhe sigurisht që ai do të jetë një kryebashkiak shumë i suksesshëm. Sa më i suksesshëm të jetë ai, aq më i lumtur do të jem unë. Sigurisht që do ta ndihmojmë.”

Kryebashkiaku Mamdani tha: “Biseda ime me presidentin ishte jashtëzakonisht e rëndësishme për mua. Ne ndajmë një dashuri të përbashkët për qytetin e New York-ut. E dimë që shumë njerëz që e konsiderojnë këtë qytet si shtëpi po vuajnë nga çmimet e larta në SHBA. Diskutuam çështje të ndryshme.”

Mamdani shtoi:

“Natyrisht, në qytetin tonë ka shumë probleme për të cilat duhet të marrim përgjegjësi. Disa prej tyre filluan para se presidenti të hynte në detyrë. Ne kemi trashëguar politikat problematike të së kaluarës. Por shpesh shohim që klasa punëtore në New York është harruar. Dhe tani do ta vendosim atë në qendër të politikave dhe planeve tona. Jemi një nga qytetet më të pasura në historinë botërore, por një në pesë persona nuk mund të blejë as një biletë metroje.”

Trump vazhdoi:

“Krahasuar me mandatin tim të parë, natyrisht ka kaluar shumë kohë. Në mandatin tim të parë kishim ekonominë më të mirë në historinë amerikane. Tani jemi edhe më mirë dhe më të suksesshëm. Disa prej pikëpamjeve të mia kanë ndryshuar. Mund të ketë mosmarrëveshje, por unë besoj plotësisht se ai do të bëjë një punë të shkëlqyer. Dhe do t’i befasojë disa konservatorë dhe disa liberalë.”

Mamdani theksoi se diskutimi i tyre nuk u fokusua te mosmarrëveshjet: “Kemi një qëllim të përbashkët – t’u shërbejmë qytetarëve të New York-ut.”

Trump shtoi gjithashtu se synojnë çarmatosjen e plotë të Hamasit dhe të grupeve të tjera:

“Shpresojmë të vendosim paqe edhe në Lindjen e Mesme. Princi i kurorës i Arabisë Saudite ishte këtu ditët e fundit dhe ne po i afrohemi vlerës totale prej 20 trilionë dollarësh.

Po, Hezbollahu ka qenë një problem i madh për Libanin. Ne po punojmë me Libanin dhe me të gjithë në rajon. Ne duam paqe në Lindjen e Mesme.

Kemi marrëdhënie shumë të mira me Mbretërinë e Bashkuar. Por ata kanë një problem të madh energjetik. Kanë vendosur turbina ere kudo. Duhet të përdorin metoda të tjera. Në Mbretërinë e Bashkuar energjia ka dalë jashtë kontrollit. Gjithashtu kanë një problem të madh emigracioni.”

I pyetur nëse e ka diskutuar planin me presidentin e Ukrainës, Zelenski, Trump tha: “Po, kemi folur me disa nga njerëzit e ekipit të tij. Ajo që po ndodh është e tmerrshme. Ata duhej të vepronin më shpejt, por dimri është i ftohtë. Shumë objekte energjetike janë nën sulm. Ne besojmë se kemi gjetur një rrugë drejt paqes, por Zelenski duhet ta aprovojë.”

I pyetur nëse do ta tërheqë mbështetjen për Ukrainën nëse Zelenski nuk e pranon planin, Trump u përgjigj: “Në një moment ai do të duhet të pranojë diçka. Mos harroni se ai ishte në Zyrën Ovale para pak kohësh. I thashë atij se nuk kishte karta në dorë. Mos harroni që kjo luftë më ra mua në pjesë. Nëse do të isha unë president, kjo luftë nuk do të kishte ndodhur.”