Albania News Agency

Presidenti i Ukrainës tha se ministri i Drejtësisë Herman Halushçenko dhe ministrja e Energjisë Svitlana Grynchuk nuk mund të qëndrojnë më në detyrë. Ai gjithashtu bëri thirrje për vendosjen e sanksioneve personale ndaj mikut dhe ish-partnerit të tij të biznesit, Timur Mindich, i cili dyshohet se është organizatori i planit.

Duke pranuar zemërimin e njerëzve, Zelenski deklaroi: “Në sektorin e energjisë duhet të ketë ndershmëri maksimale në të gjitha proceset. Unë mbështes çdo hetim të zhvilluar nga organet ligjzbatuese dhe autoritetet kundër korrupsionit. Ky është një qëndrim absolutisht i qartë dhe i qëndrueshëm për të gjithë.”

Duke premtuar se atyre që shkelin ligjin do t’u kërkohet llogari, Zelenski shtoi: “Tani për të gjithë në Ukrainë situata është jashtëzakonisht e vështirë – ndërprerje të energjisë, sulme ruse dhe humbje njerëzish. Në mesin e gjithë kësaj, është absolutisht e papranueshme që të ekzistojnë skema korrupsioni në sektorin e energjisë.”

Ngjarja po kthehet në një krizë të madhe politike për Zelenskin. Aktivistët kundër korrupsionit, politikanët e opozitës dhe veteranët e ushtrisë e kanë thirrur Zelenskin të ndërmarrë hapa vendimtarë, edhe nëse kjo nënkupton largimin nga puna dhe burgosjen, në mënyrë të dhimbshme, të personave që ai i njeh personalisht.

Kjo çështje pason një hetim 15-mujor të Zyrës Kombëtare të Luftës kundër Korrupsionit në Ukrainë (NABU) ndaj ndërmarrjes shtetërore bërthamore të energjisë, Energoatom. I dyshuari kryesor, Mindich, është biznesmen dhe bashkëthemelues i kompanisë së prodhimit mediatik të Zelenskit, Kvartal 95.

Raportohet se Mindich, me gjasë, ka ikur jashtë vendit, në Izrael, vetëm disa orë para se hetuesit të mbërrinin për të bastisur banesën e tij në Kiev. Dikur ai kishte marrëdhënie të ngushta me Zelenskin, por burimet thonë se që nga pushtimi i gjerë i Rusisë ata kanë pasur shumë pak komunikim.