Albania News Agency

Një vendim i tillë u miratua dje dhe pritet të rrisë presionin mbi vendet evropiane për të legalizuar kufizimet mbi përdorimin e rrjeteve sociale nga fëmijët.

Parlamenti Evropian miratoi një rezolutë sipas së cilës fëmijët nën 16 vjeç nuk mund të përdorin rrjete sociale pa lejen e prindërve. Edhe pse nuk është detyruese për vendet e BE-së, rezoluta synon krijimin e një kuadri ligjor mbi këtë çështje.

Rezoluta u miratua me shumicë dërrmuese. Debatet mbi kufizimin e përdorimit të rrjeteve sociale nga fëmijët janë intensifikuar ndjeshëm kohët e fundit.

Qeveria e Danimarkës kishte njoftuar më parë se ndalon përdorimin e rrjeteve sociale nga fëmijët nën 15 vjeç.

Eurodeputetja daneze dhe autorja e projekt-rezolutës, Christel Schaldemose, tha se mbrojtja e fëmijëve është jo vetëm përgjegjësi e prindërve, por edhe e politikanëve dhe e gjithë shoqërisë.

Komisioni Evropian po shqyrton mundësinë e ndalimit të përdorimit të rrjeteve sociale nga fëmijët nën 16 vjeç, një ligj që do të hyjë në fuqi në Australi në dhjetor.

Kryetarja e Komisionit Evropian, Ursula von der Leyen, tha se do të ndjekë nga afër zbatimin e ligjit. Ajo theksoi se fëmijët janë të cenueshëm në rrjetet sociale dhe se kjo mund të shkaktojë probleme serioze për ta.

Ajo premtoi të caktojë një komitet ekspertësh para fundit të vitit për të gjetur mënyra për të mbrojtur fëmijët nga efektet e dëmshme të rrjeteve sociale.