Albania News Agency

Në deklaratën e ESA-s thuhet: “Me vetëm një vit të mbetur për të arritur objektivin, çfarë ka arritur misioni deri tani? Dhe çfarë mund të presim nga këto dy anije kozmike kur të futen në orbitën e planetit shkëmbor më të vogël dhe më pak të eksploruar në Sistemin Diellor?” – dhe jepen këto të dhëna:

“Gjatë shtatë viteve të fundit, BepiColombo ka kaluar një herë pranë Tokës, dy herë pranë Venusit dhe gjashtë herë pranë Merkurit. Përveç studimit të planeteve, misioni ka monitoruar aktivitetin diellor dhe ka hetuar se si graviteti i Diellit, duke përkulur hapësirë-kohën, ndikon në sinjalet radio.

Sipas ESA-s, faza kryesore ‘shkencore’ e misionit do të fillojë pasi anija Mercury Planetary Orbiter (MPO) e ESA-s dhe Mercury Magnetospheric Orbiter (MMO ose Mio) e JAXA-s të hyjnë në orbitën e Merkurit, por shkencëtarët dhe inxhinierët e kanë shfrytëzuar në maksimum udhëtimin e gjatë deri në arritjen e objektivit.

Në deklaratën e ESA-s theksohet: “Një moment i rëndësishëm është matja e mjedisit magnetik të Merkurit gjatë çdo fluturimi të afërt pranë këtij planeti të vogël. Fusha magnetike e Merkurit mbron sipërfaqen e planetit nga intensiteti i grimcave që vijnë nga Dielli dhe që njihen si erë diellore”, dhe shtohet:

“Megjithatë, për shkak se planeti rrotullohet në një orbitë shumë të afërt me Diellin, në këtë rajon, ku era diellore është më e dendur dhe fusha magnetike e vetë Diellit është më e fortë, madhësia dhe forma e ‘flluskës’ mbrojtëse magnetike të Merkurit varen nga aktiviteti diellor. Të kuptuarit se si funksionon fusha magnetike e Merkurit është një nga misteret më të rëndësishme që BepiColombo po përpiqet të zgjidhë.”