Albania News Agency

Një zyrtar i Komisionit Evropian tha për POLITICO se udhëzimet e reja për vendet e bllokut, që pritet të publikohen në fund të vitit, do të propozojnë kufizime më të rrepta për dhënien e vizave për rusët dhe qytetarët e vendeve të tjera armiqësore.

Dy diplomatë evropianë nga vendet që kufizohen me Rusinë thanë se qeveritë e tyre kanë ushtruar presion mbi Brukselin prej vitesh për të publikuar udhëzime të tilla, dhe një diplomat shtoi se publikimi është vonuar. Zyrtari i Komisionit dhe diplomatët evropianë kërkuan të mbeten anonimë pasi nuk janë të autorizuar të diskutojnë publikisht këtë çështje të ndjeshme.

Pas nisjes së pushtimit të plotë të Ukrainës nga Rusia në shtator 2022, BE-ja pezulloi marrëveshjen për lehtësimin e vizave me Moskën, gjë që e bëri procesin e aplikimit më të shtrenjtë dhe më të vështirë.

Megjithatë, vizat mbeten përgjegjësi e vendeve anëtare, që do të thotë se Komisioni nuk mund të vendosë ndalim të plotë për hyrjen e rusëve në bllok.

Si rezultat, politikat kombëtare ndryshojnë ndjeshëm: Polonia, Çekia, Finlanda, Letonia, Estonia dhe Lituania bllokojnë ose kufizojnë ndjeshëm aplikimet e rusëve, përveç rasteve të veçanta; ndërsa Hungaria, Franca, Spanja dhe Italia vazhdojnë të japin viza më fleksibël.

Sipas të dhënave të Komisionit, në vitin 2024 rusëve iu dhanë mbi gjysmë milioni viza Shengen. Ky është një rritje e dukshme krahasuar me vitin 2023, por shumë më pak se nivelet para luftës, kur në vitin 2019 rusëve iu dhanë mbi 4 milionë viza.

Sipas zyrtarit të Komisionit, strategjia e bllokut që pritet të publikohet në dhjetor nuk do të vendosë rregulla detyruese, por do të ofrojë udhëzime të përbashkëta, përfshirë kritere më të ashpra për hyrjen e rusëve.

Sipas një thirrjeje nga Brukseli për prova, plani do të përqendrohet pjesërisht në “adresimin e sfidave të reja, veçanërisht atyre që lidhen me rreziqet e sigurisë”.