Albania News Agency

Paketa gjithëpërfshirëse ligjore synon të çlirojë burime publike për banesa të reja, të vërë nën kontroll praktikat e qiradhënies afatshkurtër dhe të reduktojë procedurat administrative për projektet e ndërtimit.

Komisioneri për Strehimin, Dan Jørgensen, tha: “Evropa duhet të marrë kolektivisht përgjegjësi për krizën e banesave që prek miliona qytetarë tanë dhe të veprojë”, duke vënë në dukje se çmimet e banesave në të gjithë bllokun janë rritur me më shumë se 60% gjatë dhjetë viteve të fundit. “Strehimi nuk është thjesht një mall: është një e drejtë themelore.”

Dan Jørgensen paralajmëroi se, nëse BE-ja nuk vepron, rrezikon të “lërë një vakum ku forcat politike ekstremiste mund të marrin pushtetin duke shfrytëzuar pakënaqësinë e votuesve”.

Plani i Komisionit përfshin rishikimin e rregullave të ndihmës shtetërore për të autorizuar shprehimisht përdorimin e fondeve publike për ndërtimin e banesave të përballueshme, me synim rritjen e stokut të banesave. Këto rregulla të reja do t’u mundësojnë qeverive kombëtare të derdhin fonde në banesa për familjet e shtresës së mesme, të cilat po përjashtohen gjithnjë e më shumë nga tregu i banesave.

Komisioni, në bashkëpunim me Bankën Evropiane të Investimeve, bankat kombëtare dhe institucione të tjera financiare, do të mobilizojë gjithashtu burime publike dhe private për banesa të reja sociale dhe të përballueshme përmes një platforme investimesh në mbarë Evropën. Ndërtimi i banesave të tilla do të renditet si objektiv i veçantë në planet kombëtare të partneritetit që shtetet anëtare do të përdorin për të shpërndarë fondet e BE-së të caktuara për to në buxhetin e ardhshëm shtatëvjeçar të unionit.

Për të rritur më tej ofertën, plani përfshin një Strategji të re Evropiane për Ndërtimin e Banesave, me synim thjeshtimin dhe dixhitalizimin e proceseve të lejeve; kjo strategji do të plotësohet në vitin 2027 me një paketë thjeshtimi për strehimin.

Brukseli propozon gjithashtu masa për krijimin e standardeve të përbashkëta për materialet e ndërtimit dhe investime të mëdha për modernizimin e sektorit të ndërtimit në bllok. Në mënyrë të ngjashme, parashikohet që në fund të vitit 2026 të paraqitet një Akt për Shërbimet e Ndërtimit, i cili do t’u mundësojë kompanive të ndërtimit të ofrojnë shërbime ndërkufitare duke garantuar standardet e punës dhe të punësimit.

Për të siguruar që banesat të shiten me çmime të drejta, plani propozon trajtimin e problemit më të gjerë të spekulimit përmes një analize të kujdesshme të tregut të banesave. Gjatë vitit të ardhshëm, Komisioni do të mbledhë të dhëna për shkallën e këtij fenomeni, i cili bën që banesat jetike të “trajtohen si ari apo Bitcoin dhe investime të tjera të kryera vetëm për qëllim fitimi”.