Albania News Agency

FT shkruan: “Zyrtarët e administratës Trump, veçanërisht Whitkoff, kanë ushtruar presion ndaj negociatorëve ukrainas javët e fundit për një shkëmbim territorial që e konsiderojnë pjesë të pashmangshme të çdo marrëveshjeje paqeje.”

Sipas zyrtarëve anonimë në Kiev, i dërguari i posaçëm i presidentit amerikan është “i fiksuar” me idenë se një paqe e drejtë mund të arrihet nëse Ukraina heq dorë nga pjesa e mbetur e Donbasit, duke shmangur kështu një konflikt më të gjatë dhe më shkatërrues.

Të martën, Trump i tha Zelenskyt të përqendrohej dhe të pranonte kushtet e propozuara, sepse “po humb”. Ai theksoi se Rusia është shumë më e fortë se Ukraina dhe ka avantazh në konflikt.

Javën e kaluar, Vladimir Putin priti në Kremlin Whitkoff-in dhe dhëndrin e Trump-it, Jared Kushner. Palët diskutuan rreth pesë orë rreth iniciativës amerikane të paqes, por ende nuk kanë arritur një kompromis.

Më vonë, lideri rus deklaroi se Uashingtoni e ka ndarë planin fillestar prej 27 pikash në katër paketa dhe ka propozuar që ato të diskutohen veçmas. Ai shtoi se ka shqyrtuar pothuajse të gjitha pikat dhe se “ekzistojnë çështje me të cilat Moska nuk është dakord”.