Albania News Agency

Ministria e Punëve të Jashtme e Greqisë, në deklaratën e saj me rastin e 43-vjetorit të shpalljes së njëanshme të të ashtuquajturit shtet në Qipro, e cilësoi këtë shpallje si shkelje të qartë të së drejtës ndërkombëtare dhe të parimeve themelore të Kartës së Kombeve të Bashkuara.

Ministria kujtoi se shpallja ishte cilësuar e paligjshme dhe e pavlefshme përmes rezolutave 541 (1983) dhe 550 (1984) të Këshillit të Sigurimit të OKB-së.

Në deklaratë u theksua se Greqia i hedh poshtë kategorikisht pasojat e ndërhyrjes dhe pushtimit të Qipros nga Turqia. Të gjitha shteteve iu bë thirrje të respektojnë të drejtën ndërkombëtare, të kundërshtojnë çdo formë revizionizmi dhe të respektojnë sovranitetin, pavarësinë dhe integritetin territorial të Republikës së Qipros.

Në deklaratë u bë e ditur se Greqia vepron në koordinim të plotë me Republikën e Qipros dhe mbetet e vendosur për arritjen e një zgjidhjeje gjithëpërfshirëse dhe të pranueshme nga të dyja palët, mbi bazën e një federate dykomunitare dhe dyzonale me barazi politike, një personalitet të vetëm juridik ndërkombëtar, një sovranitet të vetëm dhe një shtetësi të vetme.

Në deklaratë u theksua gjithashtu se synohet një zgjidhje në përputhje me rezolutat e Këshillit të Sigurimit të OKB-së dhe legjislacionin e Bashkimit Evropian.

Ministria e Punëve të Jashtme e Greqisë mirëpriti gjithashtu përpjekjet e Sekretarit të Përgjithshëm të OKB-së dhe të Përfaqësuesit të tij të Posaçëm për Qipron për rifillimin e negociatave thelbësore me qëllim arritjen e një zgjidhjeje të drejtë, të qëndrueshme dhe funksionale.