Albania News Agency

Sipas raportimit të CCTV, Sekretari i Përgjithshëm i OKB-së, Antonio Guterres, foli për tensionet në rritje në rajon gjatë seancës së hapur të Këshillit të Sigurimit të OKB-së kushtuar Lindjes së Mesme.

Guterres tha se për shkak të rritjes së armiqësive, Lindja e Mesme po zhytet në një krizë më të thellë, duke krijuar rrezikun e “rifillimit të plotë të konfliktit”, pasojat e të cilit do të shtrihen përtej kufijve të rajonit. Ai theksoi se popullsia e rajonit, veçanërisht komunitetet më të cenueshme, po paguajnë një çmim të rëndë dhe shprehu shqetësim të thellë për përkeqësimin e mëtejshëm të situatës.

Duke folur për situatën në Liban, Guterres vuri në dukje se Izraeli ka intensifikuar operacionet e tij, ndërsa Hezbollah po kryen sulme në thellësi të territorit izraelit. Ai tha se këto përplasje kanë shkaktuar shkatërrime të mëdha në Libanin Jugor dhe zhvendosjen e më shumë se një milion civilëve. Sekretari i Përgjithshëm bëri të ditur gjithashtu se deri tani kanë humbur jetën shtatë paqeruajtës të OKB-së.

Guterres u bëri thirrje palëve të arrijnë një zgjidhje diplomatike në përputhje me Rezolutën 1701 të Këshillit të Sigurimit të OKB-së dhe të respektojnë integritetin territorial të Libanit.