Albania News Agency

Duke udhëtuar të hënën drejt Egjiptit për të marrë pjesë në samitin për Gazën, Macron tha për partitë opozitare franceze: “Shumica e atyre që nxisin përçarje dhe spekulime nuk janë larguar nga postet e tyre.” Ai shtoi se “forcat politike” rivale që “provokuan destabilizimin” e kryeministrit Sébastien Lecornu janë “të vetmet përgjegjëse për këtë kaos.”

Aleati i Macron-it, Lecornu, mbajti mbledhjen e parë të qeverisë së re franceze pasi emëroi disa figura të rëndësishme nga krahu centrist i Macron-it, si dhe disa drejtues të lartë nga administrata publike dhe shoqëria civile. Ndër të sapoardhurit ishte edhe Jean-Pierre Farandou, presidenti i hekurudhave shtetërore SNCF dhe tani ministër i punës.

Kjo është qeveria e dytë e Francës brenda një jave: qeveria e parë e Lecornu-së u rrëzua pas vetëm 14 orësh për shkak të kritikave për mungesën e “fytyrave të reja”, dhe ai dha dorëheqjen në mënyrë dramatike të hënën e kaluar. Të premten në mbrëmje, Macron e riemëroi atë dhe deri të dielën Lecornu kishte formuar një kabinet të ri. Shumë gazeta rajonale, përfshirë La Provence dhe La République du Centre, pyetën: “Sa do të zgjasë kjo?”