Albania News Agency

Presidenti i Francës, Emmanuel Macron, dënoi sulmet e fundit me raketa dhe dronë të Rusisë kundër Kievit dhe rrethinave të tij, duke deklaruar se sulmet e Moskës ndaj civilëve janë të papranueshme.

Macron tha se Rusia ka sulmuar edhe një herë zona të banuara nga civilët, duke i cilësuar sulmet me raketa dhe dronë si një “politikë terrori”.

Macron deklaroi: “Në Kiev dhe rrethinat e tij, Rusia zgjodhi edhe një herë të godasë civilët. Kjo politikë terrori e kryer me raketa dhe dronë është e papranueshme.”

Duke theksuar se çdo sulm i ri e bën edhe më të qartë përgjegjësinë e Rusisë, Macron tha: “Çdo sulm i ri konfirmon një fakt: Rusia duhet të paguajë çmimin e agresionit të saj dhe të mbahet përgjegjëse për krimet e saj. Ne do të qëndrojmë pranë Ukrainës dhe nuk do t’i dorëzohemi as lodhjes dhe as përpjekjeve për frikësim.”

Macron shtoi se Bashkimi Evropian dhe vendet partnere do të vazhdojnë mbështetjen për Ukrainën: “Bashkimi Evropian dhe partnerët e tij do të vazhdojnë të rrisin presionin mbi Rusinë, veçanërisht me sanksione të reja, si edhe duke forcuar mbështetjen ushtarake për Ukrainën, në mënyrë që ajo të mund të mbrojë veten dhe popullin e saj.”