Albania News Agency

61-vjeçari Maximo Napa u shpëtua të martën në varkën e tij të vogël të peshkimit pasi u pikas nga një anije ekuadoriane pranë bregdetit të Chimbote, në veri të Perusë.

Mes lotëve, ai tregoi për mediat lokale se kishte mbijetuar duke ngrënë buburreca, zogj dhe një breshkë.

Napa: "Nuk doja të vdisja për nënën time. Kam një nip dy muajsh. U mbajta pas tij. Çdo ditë mendoja për nënën time", tha ai.

Peshkatari u lirua nga spitali në qytetin bregdetar të Paitës të shtunën.

Kapitani i portit të Marinës Peruane, Jorge González, deklaroi: "Zoti Napa arriti në një gjendje të mirë fizike. Mund të ecte, mund të lahej. Ishte në shok, por fizikisht ishte mirë."

Peshkatari u nis nga porti San Juan de Marcona më 7 dhjetor, por kushtet e këqija të motit dhe rrymat e detit e çuan jashtë kursit.

Varka e tij e vogël, e cila nuk kishte sinjal radio, u tërhoq në det të hapur.

Vajza e tij, Ines Napa, i tha stacionit radiofonik RPP: "Gjetja e babait tim është një mrekulli, si familje kurrë nuk humbëm shpresën për ta gjetur."