Albania News Agency

Javën e kaluar, Macron tha se do të ishte “e dobishme” që Evropa të kontaktonte Moskën për të siguruar që marrëveshja e paqes për Ukrainën të mos negociohet vetëm nga SHBA-të, Rusia dhe Ukraina.

Sipas raportimeve mediatike, zëdhënësi i Kremlinit Dmitry Peskov deklaroi të dielën se presidenti rus Vladimir Putin ka shprehur gatishmërinë “të hyjë në dialog” me Macronin për këtë çështje.

Pallati Elize reagoi pozitivisht. Presidenca franceze tha: “Miratimi publik i Kremlinit për këtë qasje është i mirëpritur. Në ditët në vijim do të vendosim se si të ecim më tej në mënyrën më të mirë”

Macron e përsëriti këtë qëndrim javën e kaluar në samitin e BE-së në Bruksel, duke theksuar se do të ishte “e dobishme” që Evropa të kontaktonte Putinin. Duke folur me gazetarët herët të premten pas përfundimit të samitit, ai tha: “Mendoj se ne, evropianët, së bashku me ukrainasit, duhet të gjejmë një kornizë ku të zhvillojmë bisedime të rregullta”

Sipas Le Monde, Pallati Elize theksoi se çdo kontakt me Rusinë do të zhvillohet me “transparencë të plotë” me presidentin ukrainas Volodymyr Zelenskyy dhe aleatët evropianë.

Macron dhe Putin kanë pasur rrallë kontakte të drejtpërdrejta që nga fillimi i luftës së Rusisë në Ukrainë në fillim të vitit 2022. Kontakti i tyre i fundit telefonik u zhvillua në korrik, pas një pauze gati trevjeçare.