Albania News Agency

Anija, e identifikuar nga Danimarka si Yi Peng 3, kaloi pranë dy kabllove të dielën dhe të hënën, në kohën kur dyshohet se ata u shkëputën si rezultat i një sulmi dashakeq. Anija ka qenë në ujërat ndërmjet Suedisë dhe Danimarkës dhe që atëherë është ndjekur nga një anije luftarake daneze.

Komanda daneze e mbrojtjes deklaroi: "Mbrojtja daneze mund të konfirmojë se kemi qenë në zonën pranë anijes kineze Yi Peng 3. Aktualisht, mbrojtja daneze nuk ka ndonjë koment tjetër."

Autoritetet suedeze konfirmuan interesin për anijen, por nuk dhanë detaje të tjera.

Ekipet suedeze të specializuara në kërkime nënujore të mërkurën u përpoqën të mblidhnin prova në vendin ku ndodhet kablloja midis Finlandës dhe Gjermanisë. Edhe një kabllo midis Suedisë dhe Lituanisë ka pësuar dëmtime.

Policia suedeze deklaroi se anija kineze pranë brigjeve të Danimarkës është pjesë e hetimeve të tyre. "Kjo është pjesë e objektit të interesit, por mund të ketë edhe më shumë," tha Per Engström nga Departamenti Kombëtar i Operacioneve të Suedisë.

Zëdhënësi i Ministrisë së Jashtme kineze, Lin Jian, deklaroi: "Kina, si një shtet flamur, i përmbush detyrimet e saj në mënyrë të qëndrueshme dhe të plotë dhe kërkon që anijet kineze të respektojnë rreptësisht ligjet dhe rregulloret përkatëse."