Albania News Agency

Sipas një njoftimi nga Kremlini, presidenti i Sirisë, Ahmed Shara, udhëtoi drejt Rusisë për një vizitë pune.

Në axhendën e bisedimeve ishin gjendja e marrëdhënieve dypalëshe në fusha të ndryshme dhe situata aktuale në Lindjen e Mesme.

Presidenti rus Putin shprehu kënaqësinë për mundësinë për ta pritur sërish presidentin sirian Ahmed Shara në Moskë.

Putin theksoi se që nga takimi i fundit koha nuk ka shkuar dëm dhe se është bërë shumë për rindërtimin e marrëdhënieve ndërshtetërore. “Gjithashtu, arritëm të kapërcejmë ngërçin në bashkëpunimin ekonomik me një rritje mbi 4 për qind. Kjo mund të mos jetë aq ambicioze sa do të dëshironim, por megjithatë është një përparim i dukshëm dhe ne patjetër duhet ta vazhdojmë këtë trend pozitiv,” tha ai.

Duke theksuar se marrëdhëniet ruso-siriane kanë rrënjë të thella, Putin deklaroi:

“Tani, në realitetet e reja, pjesërisht dhe mbi të gjitha falë përpjekjeve tuaja, marrëdhëniet mes Sirisë dhe Rusisë po zhvillohen. Komponentin ekonomik e kam përmendur tashmë. Ka shumë çështje për t’u diskutuar dhe patjetër do ta shfrytëzojmë vizitën tuaj të sotme për këtë.”

Duke vënë në dukje se Rusia po ndjek nga afër përpjekjet për rivendosjen e integritetit territorial të Sirisë, Putin tha: “Ju përgëzoj për vrullin që ka fituar ky proces. Ne kemi mbështetur gjithmonë rivendosjen e integritetit territorial të Sirisë dhe vazhdojmë të mbështesim të gjitha përpjekjet tuaja në këtë drejtim.”

Presidenti sirian Shara, nga ana e tij, tha: “Siria ka bërë përparime të mëdha vitin e kaluar dhe ka kaluar fazën e sanksioneve. Sigurisht, një nga sfidat më të mëdha mbetet bashkimi i Sirisë. Ne kemi punuar për këtë që nga viti i kaluar. Rusia luan një rol të madh në stabilizimin e situatës jo vetëm atje, por edhe në rajon. Rajoni ynë ka nevojë urgjente për stabilitet, ndaj ju falënderoj shumë, zoti President, për përpjekjet tuaja.”