Albania News Agency

Sipas njoftimit, në kuadër të marrëveshjes që është miratuar njëzëri nga komiteti i posaçëm i bordit të drejtorëve të DigitalBridge, SoftBank do të blejë të gjitha aksionet e DigitalBridge për 16 dollarë në para të gatshme për aksion.

Kjo përfaqëson një premium prej 15% krahasuar me çmimin e mbylljes së aksioneve të DigitalBridge më 26 dhjetor. Sipas SoftBank, marrëveshja pritet të përfundojë në gjysmën e dytë të vitit të ardhshëm.

Drejtori ekzekutiv dhe kryetari i SoftBank, Masayoshi Son, deklaroi se kjo blerje “do të forcojë bazat e qendrave të të dhënave të gjeneratës së ardhshme për inteligjencën artificiale” dhe do të avancojë vizionin e kompanisë për t’u bërë një ofrues kryesor i platformave të “Super Inteligjencës Artificiale”. Ai shtoi: “Ndërsa inteligjenca artificiale po transformon industritë në mbarë botën, kemi nevojë për më shumë fuqi llogaritëse, lidhje, energji dhe infrastrukturë të shkallëzueshme”.

Pas njoftimit, aksionet e DigitalBridge u rritën me rreth 10%.

Marrëveshja midis SoftBank dhe DigitalBridge u realizua në një periudhë kur infrastruktura që qëndron në themel të aplikacioneve të AI po përjeton një bum global. Drejtori ekzekutiv i DigitalBridge, Marc Ganzi, tha: “Ndërtimi i infrastrukturës së inteligjencës artificiale përfaqëson një nga mundësitë më të rëndësishme të investimit të brezit tonë”.

Ganzi shtoi: “Vizioni, fuqia kapitale dhe rrjeti global i SoftBank do të na mundësojnë të përshpejtojmë misionin tonë me më shumë fleksibilitet, të realizojmë investime më afatgjata në emër të investitorëve tanë dhe t’u shërbejmë më mirë kompanive kryesore teknologjike të botës teksa ato zgjerojnë objektivat e tyre në AI”.

SoftBank më herët shiti të gjitha aksionet e saj në prodhuesin amerikan të çipave Nvidia për 5,83 miliardë dollarë për të investuar në OpenAI.

DigitalBridge e përshkruan veten si “një kompani unike e infrastrukturës digjitale” dhe sipas faqes së saj të internetit, në fund të shtatorit menaxhonte asete me vlerë rreth 108 miliardë dollarë.