Albania News Agency

Sipas deklaratës së Ministrisë së Punëve të Jashtme të Ukrainës, Rusia kreu një nga sulmet më të mëdha me raketa balistike kundër Kievit që nga fillimi i luftës në shkallë të plotë.

Gjatë natës u lëshuan mbi 40 raketa të llojeve të ndryshme dhe 120 dronë sulmues në të gjithë Ukrainën, ku shumica e raketave kishin si objektiv kryeqytetin Kiev. Si pasojë e sulmit, një person humbi jetën dhe të paktën 16 të tjerë u plagosën.

U bë e ditur se rreth 600 punonjës të shërbimeve të emergjencës vazhdojnë të punojnë në terren për të përballuar pasojat e sulmit. Gjithashtu u njoftua se vetëm gjatë kësaj jave Rusia ka lëshuar kundër Ukrainës rreth 1450 dronë sulmues, më shumë se 1640 bomba ajrore të drejtuara dhe 99 raketa. Si rezultat i këtyre sulmeve ka viktima dhe të plagosur civilë, ndërsa shtëpi dhe infrastrukturë kritike janë dëmtuar në më shumë se dhjetë rajone.